Thursday, November 8, 2012

മരവ്യവസായം സംരക്ഷിയ്ക്കാന്‍ ബഹുജന കണ്‍വെന്‍ഷന്‍


പെരുമ്പാവൂര്‍: മരവ്യവസായത്തെ തകര്‍ക്കാനുള്ള ഗൂഢനീക്കത്തിനെതിരെ ബഹുജന കണ്‍വെന്‍ഷന്‍ സംഘടിപ്പിയ്ക്കുമെന്ന് സോമില്‍ ഓണേഴ്‌സ് ആന്റ് പ്ലൈവുഡ് മാനുഫാക്‌ചേഴ്‌സ് അസോസിയേഷന്‍ ഭാരവാഹികള്‍ പത്രസമ്മേളനത്തില്‍ അറിയിച്ചു.
പതിനായിരങ്ങള്‍ക്ക് നേരിട്ട് തൊഴിലും പതിന്‍മടങ്ങ് അനുബന്ധ തൊഴില്‍ അവസരങ്ങളും നല്‍കുന്ന മരവ്യവസായത്തെ തകര്‍ക്കാനുള്ള ഉത്തരേന്ത്യന്‍ ലോബിയുടെ അജണ്ട നടപ്പാക്കുന്ന ഉപകരണങ്ങളാണ് ഇവിടുത്തെ പരിസ്ഥിതിവാദികളെന്നും ഭാരവാഹികള്‍ കുറ്റപ്പെടുത്തി. സര്‍ക്കാരിന് കോടികളുടെ വരുമാനമുള്ള ഈ വ്യവസായത്തിനെതിരെ പ്രവര്‍ത്തിയ്ക്കുന്ന സംഘടനകളുടെ സാമ്പത്തിക ഉറവിടത്തെപ്പറ്റി സര്‍ക്കാര്‍ ഏജന്‍സി അന്വേഷണം നടത്തണമെന്ന് അസോസിയേഷന്‍ പ്രസിഡന്റ് എം.എം മുജ്ജീബ് റഹ്മാന്‍ ആവശ്യപ്പെട്ടു.
ജില്ലയില്‍ ആകെയുള്ള 1500 മരവ്യവസായ യൂണിറ്റുകളില്‍ 300 യൂണിറ്റുകളാണ് പ്ലൈവുഡ് നിര്‍മ്മിയ്ക്കുന്നത്. ഇവയൊക്കെ എല്ലാ നിയമങ്ങളും പാലിയ്ക്കുന്നവയാണ്. യാതൊരു പാരിസ്ഥിതിക പ്രശ്‌നങ്ങളും ഈ യൂണിറ്റുകള്‍ വഴി ഉണ്ടാവുന്നില്ല. ഒറ്റപ്പെട്ട ചില കോടതി പരാമര്‍ശത്തിന്റെ പേരില്‍ മലിനീകരണത്തിന്റേയും പകര്‍ച്ചവ്യാധികളുടേയും മുഴുവന്‍ ഉത്തരവാദിത്വവും തങ്ങള്‍ക്കുമേല്‍ കെട്ടിവച്ച് ഈ വ്യവസായത്തെ തകര്‍ക്കാമെന്ന് ആരും കരുതേണ്ടെന്നും ഭാരവാഹികള്‍ പറഞ്ഞു.
പരിസ്ഥിതി സംരക്ഷിച്ചു കൊണ്ടുള്ള വ്യവസായവും മരവ്യവസായത്തെ നിലനിര്‍ത്തികൊണ്ടുള്ള പരിസ്ഥിതി സംരക്ഷണവും ഉറപ്പുവരുത്താന്‍ സംഘടിപ്പിയ്ക്കുന്ന കണ്‍വെന്‍ഷനില്‍ എം.എല്‍.എ മാരടക്കമുള്ള രാഷ്ട്രീയ സാമൂഹിക, സാമുദായിക നേതാക്കള്‍ പങ്കെടുക്കുമെന്ന് ജനറല്‍ സെക്രട്ടറി കെ.എം അബ്ദുള്‍ കരീം, ട്രഷറര്‍ സി. കെ അബ്ദുള്‍ മജീദ് എന്നിവര്‍ പത്രസമ്മേളനത്തില്‍ വിശദീകരിച്ചു.

No comments: